Бай-Тайга чурттуг билдингир чогаалчы, гомеопат эмчи Серен-Чимит Зинаида Салчаковнаның чарлаан мөөрейинге Бай-Тал ортумак школазындан «Өзүмнер» бөлгүмүнүң уругларындан 12 өөреникчи шүлүктерин чоргускан турган. Март 20-де мөөрейниң түңнелдерин дыңнаарынче чогаалчының бодундан чалалганы алганывыска өөрүп, Тээлиниң төпчүткен библиотекага четкен бис. Зинаида Салчаковнаның болгаш библиотека ажылдакчыларының чылыг-чымчак уругларны болгаш башкыларны хүлээп алганы, мөөрейни түңнээни дыка солун болду. Киришкен уруглар шупту боттарының мөөрейже чоргускан шүлүктерин шээжи-биле сеткилинден чугааладылар.
Бистиң бөлгүм уругларындан 6-8 класстар аразынга 6-гы класстың өөреникчизи Ооржак Челээш 2-ги черни алган. 1500 акша шаңналын чогаалчы боду байырлыг байдалга тывыскан. 9-11 класстар аразынга 9-ку класстың өөреникчизи Оюн Оргаадай 2-ги черге төлептиг болган. База-ла 1500 акша шаңналын алган. Арткан уруглар өөрүп четтириишкинниң бижиин болгаш үнелиг тоолдар номнарын чогаалчының холундан белек кылдыр алдылар. Түңнелинде киришкен уругларны болгаш башкыларны чаагай чигирзиг чемнер-биле чогаалчывыс хүндүлээн.
Өөреникчилерни чогаал делегейин сонуургаарынче идигни берип, мындыг онзагай мөөрейни эрттиргенинге Зинаида Салчаковнага өөрүп четтиргенивисти илереттивис!
